nahin malum kyon nyara lage hai
sitam-gar hai magar pyara lage hai

nazar qatil adaen jaan-lewa
badun hathiyar hattyara lage hai

ghazab mein wo jalal-e-mehr-e-taban
tabassum mein wo mah-para lage hai

jigar thame khada hai raste mein
ye koi dard ka mara lage hai

bahut umid ne dhoke diye hain
badi makkar ayyara lage hai

jamal-arai ka hai ab ye aalam
hai sin sattar ka atthaarah lage hai

khuda sab ka khuda hai shaikh sahab
wahi mera jo tumhaara lage hai

'adu kyon aaj hai mahfil se ghaeb
hua nau aur do gyarah lage hai

safar kam mukhtasar hai zindagi ka
ki 'arsa 'umr ka sara lage hai

hawa mein mahl sab kyon hain banate
na patthar int aur gara lage hai

hua ehsas-e-tanhai ziyaada
baje hain raat ke bara lage hai

wafur-e-arzu-e-wasl 'shahid'
fasad-e-nafs ka mara lage hai