nai zaban mili hai so aisa bolte hain
shurua mein to sabhi ulta sidha bolte hain

khuda kare ki kabhi baat bhi na kar paen
ye jitne log tere aage uncha bolte hain

use kaha tha ki logon se guftugu na kare
ab us ke shahar ke sab log mitha bolte hain

kisi se bolna ba-qaeda nahin sikha
bas ek roz yunhi khud se socha bolte hain

nikal ke shor se aai thi ek darakht tale
magar yahan to parinde bhi kitna bolte hain

hum aise log koi baat dil mein rakhte nahin
kisi se koi gila ho to sidha bolte hain