nai zamin naya aasman banana hai
tere makan se behtar makan banana hai

jo baat sach hai nahin kholni zamane par
takhaiyyulat ko husn-e-bayan banana hai

hawa se teri himayat mein guftugu ke baad
diye ki lau ko tera pasban banana hai

talash karne hain kuchh apne jaise log mujhe
aur ek halqa-e-awargan banana hai

sipurd kar ke kisi ko makan-e-dil 'shahzad'
khud apne-ap ko be-khanuman banana hai