naqa-e-waqt nikalti hi chali jati hai
jism se khak phisalti hi chali jati hai

zakhm sine mein chhupa rakh ki hawa hai aisi
khak har phul pe malti hi chali jati hai

hain sab aaine pareshan ki urus-e-fitrat
rang har lahza badalti hi chali jati hai

dil-shikan kitni hai is khak-e-rawan ki raftar
pa shikaston ko kuchalti hi chali jati hai

kis ki rah dekh rahi hai ki koi sham-e-wafa
dil se kheme mein bhi jalti hi chali jati hai

sar mein kya shoala-e-khud-sar hai ki niche har shai
mom ki tarah pighalti hi chali jati hai

hath panw to main marun hun pe wo chashm-e-fusun
misl-e-gardab nigalti hi chali jati hai

phul phenke hain kisi yaad ne kya kya 'haidar'
dil mein jo rakh thi jalti hi chali jati hai