naqsh diwar-e-shikasta hi kahin ho mujh mein
dard ho yaad ho koi to makin ho mujh mein

ek jazira hun tah-e-khun-e-tamanna kab se
panw rakhne ke liye kuchh to zamin ho mujh mein

khun baqi hai to phir zakhm se bahar aae
rang dikhlae jo ek bund yaqin ho mujh mein

main tere gham ki amanat ko sambhaale rakkhun
sans koi to magar mera amin ho mujh mein

mujh sulagte hue jangal pe hai chadhti aandhi
laut jae jo bhi ab gosha-nashin ho mujh mein