naqsh-e-diwar wo surat bhi gai
meri aankhon ki wo wahshat bhi gai

wo diya bujh gaya mere andar
wo hawaon se raqabat bhi gai

jaan-sipari ke bahut dawe the
ab to jine ki nadamat bhi gai

sai-e-asudgi-e-wasl to kya
girya-e-shab ki wo fursat bhi gai

din ko sae se to kuchh sath bhi the
raat ko phir ye rifaqat bhi gai

jin se zinda the zamir-o-ehsas
ab wo andar ki malamat bhi gai

sar bhi ruswa hain ki sauda na raha
sang-e-diwar ki izzat bhi gai