naqsh-e-khayal dil se mitaya nahin hanuz
be-dard main ne tujh ko bhulaya nahin hanuz

wo sar jo teri rahguzar mein tha sajda-rez
main ne kisi qadam pe jhukaya nahin hanuz

mehrab-e-jaan mein tu ne jalaya tha khud jise
sine ka wo charagh bujhaya nahin hanuz

behosh ho ke jald tujhe hosh aa gaya
main bad-nasib hosh mein aaya nahin hanuz

mar kar bhi aaegi ye sada qabr-e-'josh' se
be-dard main ne tujh ko bhulaya nahin hanuz