naqsh-e-pa-e-karwan hai zindagi
yani yaad-e-raftagan hai zindagi

ghuncha-o-gul ka tabassum ho to ho
warna paigham-e-khizan hai zindagi

ya ghurur-e-subh sad-ummid hai
ya gham-e-sham-e-butan hai zindagi

lazzat-e-sad-talkh-baada hai mahaz
ya surur-e-jawedan hai zindagi

ya fareb-e-husn fitna-ju hai ya
sadgi-e-ashiqan hai zindagi

ya sada-e-chang ya saut-e-rabab
ya faqat aah-o-fughan hai zindagi

koi samjha hai na samjhega use
sahw-e-fikr-e-nukta-dan hai zindagi