naqsh jab zakhm bana zakhm bhi nasur hua
ja ke tab koi masihai pe majbur hua

par parwaz bhi tab tak na khule the jab tak
baith jaane ki thakan se na badan chur hua

din ki chhalni mein tera lamha-e-fursat chhane
dil to lagta hai isi kaam pe mamur hua

daman-e-dost hai ek zehn ke pardon mein kahin
jis qadar hath badhaya hai so wo dur hua

kabhi be-samt na hone ki dua mangi thi
kasrat-e-samt se rasta mera mamur hua

chikhna chahti hun chikh nahin pati hun
khwab hota tha haqiqat ko bhi manzur hua