narawa tha na-munasib tha magar achchha laga
bewafa ek dushmanon ki pusht par achchha laga

wo achanak laut aaya tod kar rasm-e-firaq
garmiyon mein sard mausam ka samar achchha laga

lag gai shayad mujhe aawargi ki bad-dua
laut kar ab ke main aaya hun to ghar achchha laga

har kisi se hans ke milna khush-dili se bolna
mera dushman hai magar us ka hunar achchha laga

ye mohabbat hai meri ya us ka hai koi kamal
jis qadar parkha use wo us qadar achchha laga

aane wale mausamon ki sakhtiyon ke zikr par
us ke chehre par akele-pan ka dar achchha laga

ab ke us ke qurb ki jannat bhi dekhi pas se
ab ke mujh ko khwab-zaron ka safar achchha laga

mere bare mein mujhi se puchhta hai wo 'naim'
is khabar ke daur mein ek be-khabar achchha laga