narm phulon se kabhi khar se lag jate hain
hum wo jugnu hain jo diwar se lag jate hain

do yatimon ki mohabbat hai ye jo udte hue
khushk patte mere rukhsar se lag jate hain

itni hamdardi se mat dekh meri aankhon mein
kuchh maraz dida-e-bimar se lag jate hain

jab tasawwur ke kharabe mein tu aa jata hai
andar andar kai bazar se lag jate hain

roz rona hai jinhen shana kahan tak dhundhe
hum to rote hue diwar se lag jate hain