nashat-e-hijr ko teri kami ko bhul gae
tere khayal mein dube tujhi ko bhul gae

wo duniya-dar hain hum ne kabhi kaha to na tha
ajib log hain is sadgi ko bhul gae

adu ne hum se hamara ghurur manga tha
ana-parast the hum zindagi ko bhul gae

junun ka ek taqaza tha sirf sar-masti
kitab jhonk di hum aagahi ko bhul gae

ye kaisi bazm saji qahqaha nahin gunja
guman hai tum bhi kisi aadmi ko bhul gae

kisi ke ashk ne sairab kar diya 'shah-ji'
so hum gharib-e-watan tishnagi ko bhul gae