nazar mein aa gai jab se janab ki surat
badal gai dil-e-khana-kharab ki surat

bhara hua hai khum-e-dil mai-e-mohabbat se
tumhaari aankh hai jam-e-sharab ki surat

hamesha ek hi haalat nahin zamana ki
hamari zist yahan hai habab ki surat

lagi hai aag yahan tak kisi ki ulfat mein
bane hain qalb-o-jigar bhi kabab ki surat

na ja tu zahid-e-nadan su-e-mai-khana
bigad na jae kisi din janab ki surat

hamare ashk ne rang-e-hina ko mat kiya
bahe hain aankh se aansu shahab ki surat

jala diya dil-e-mai-kash ko mere saqi ne
jigar kabab lahu se sharab ki surat

ba-waqt-e-naza 'qamar' aur lahad ke andar bhi
ho mere pesh-e-nazar bu-turab ki surat