nazar mein nit-nai hairaniyan liye phiriye
saron pe roz naya aasman liye phiriye

ab is faza ki kasafat mein kyun izafa ho
ghubar-e-dil hai so dil mein nihan liye phiriye

yahi bacha hai so ab zist ki gawahi mein
yahi nishan-e-dil-e-be-nishan liye phiriye

qarar-e-jaan to sar-e-ku-e-yar chhod aae
mata-e-zist hai lekin kahan liye phiriye

ajab hunar hai ki danishwari ke paikar mein
kisi ka zehn kisi ki zaban liye phiriye