nazar mein pyar dilon mein mohabbaten rakhna
kisi dayar mein rahna sadaqaten rakhna

judai phenk na de dard ke samundar mein
talluqat rakho to rifaqaten rakhna

hum apne pas yaqinon ke taj rakhte hain
hamein pasand nahin hai zaruraten rakhna

abhi hayat ke shajre mein kuchh mahaz bhi hain
hamari nasl ke aage shujaaten rakhna

ye zarq-barq libason se kuchh nahin hoga
jo rakh sako to gharon mein tilawaten rakhna