nazar-nawaz nazaron se baat karta hun
sukun nasib sahaaron se baat karta hun

ulajh raha hai jo kharon mein phir se ye daman
khizan ba-dosh bahaaron se baat karta hun

tumhaare ishq mein tum se juda juda rah kar
gham-e-firaq ke maron se baat karta hun

tere baghair ye aalam are maaz-allah
falak ke chand sitaron se baat karta hun

wufur-e-ashk se ye haal ho gaya 'qaisar'
yam-e-alam ke kinaron se baat karta hun