nazar udas jigar be-qarar chup khamosh
tujhe kaha na abhi sabr yar chup khamosh

ye manzilon ke sabhi wahime machaen shor
magar hai kis liye har rahguzar chup khamosh

wo umr bhar ke liye le gaya zaban meri
kaha tha us ne kabhi ek bar chup khamosh

na tu na teri koi baat na teri aawaz
saman hai aaj bahut sogwar chup khamosh

abhi samaaten ghayal hain talkh lafzon se
sadaen bhi hain badi tar tar chup khamosh

yahi to hai jo satata mujhe nahin tujh sa
ye tera dard bada burdbar chup khamosh

zaban phisal ke teri shan tujh se chhinegi
lagam de tu use mere yar chup khamosh

'rabab' koi dilasa na hausla maujud
zaban qufl-shuda dil dayar chup khamosh