nazron mein ab tasawwur-e-jaanan hai aur hum
un ki tajalliyat ka 'irfan hai aur hum

ab iltifat-e-gardish-e-dauran hai aur hum
ya'ni qarib-e-manzil-e-jaanan hai aur hum

ai dost tere dard-e-mohabbat ke hum nisar
har lamha ek sozish-e-pinhan hai aur hum

bite hue dinon ki faqat yaad rah gai
mahfuz dil mein sham’-e-farozan hai aur hum

hamdam na puchh dil ki tu betabiyon ka haal
pahlu mein ek sho'la-e-larzan hai aur hum