nibah karte hue sham-e-be-qarar ke sath
hamari umr kati ranj-e-be-shumar ke sath

ye intizar bhi ek kaam tha jo karna tha
magar kuchh aur bhi karna tha intizar ke sath

bayan-e-husn ko husn-e-bayan zaruri hai
kalam-e-fan bhi hai lazim jamal-e-yar ke sath

so manzilon ke tayyun se bhi gurezan hun
main dasht mein hun kisi sar-phire ghubar ke sath

shumar-e-aib nahin hai ye be-niyazi-e-husn
ye nashsha hai ki jo hota hai eqtidar ke sath