nigah-e-khak! zara pairahan badalna to
wabaal-e-ruh mera ye badan badalna to

haqiqaton ke safar mein bahut akeli hun
majaz-e-ishq! zara bankpan badalna to

junun ke bojh se thakne laga zaman o khala
gharib-e-shauq zara phir watan badalna to

naya mile to koi zaiqa tamanna ko
dil-e-tabah meri ye jalan badalna to

sulag rahi hun abhi bhi magar maza hi nahin
sarab-e-naz ghamon ki agan badalna to