nigah-e-mast se ojhal hain manzilen dil ki
hain apni aakhiri sanson pe chahaten dil ki

bahae jata hai dariya-e-ishq aakhir tak
bhale hi lakh sambhaale hon dhadkanen dil ki

zara si der bhi baitha nahin gaya nazdik
hawa si ho gain aawara rahaten dil ki

jo khud ko qabil-e-kar-e-jahan bhi rakhna tha
to hum bhi khak hi kar dalen khwahishen dil ki

isi mein chain-o-sukun kyon hai jis ne chhina hai
samajh se hi rahen bahar hain sazishen dil ki

pakad rahi ho thakan jab wajud ke bazu
uthae koi bhala kaise wahshaten dil ki

ye kis gali se 'suman' ishq apna guzra hai
lipatti hi gain daman se uljhanen dil ki