nigah-e-qahr-parwar ko bhi tamhid-e-khushi samjhe
samajhna hai to koi hum se raaz-e-zindagi samjhe

wafaon ka natija hum to jo kuchh hai samajhte hain
magar ai kash anjam-e-jafa wo bhi kabhi samjhe

use dair-o-haram mein jazbiyyat kya nazar aae
jo teri did ko asl-e-mazaq-e-bandagi samjhe

hamein to khair jo kuchh aap ne chaha wo samjhaya
magar ye to zara samjhaiye kuchh aap bhi samjhe

bhala 'nakhshab' tere is be-niyazana rawayye ko
kamal-e-qurb jaane ya mohabbat ki kami samjhe