nind tuti to samundar na jazira dekha
raat bhi main ne wahi khwab-e-shikasta dekha

sab pareshan hain lamhon ki giranbari se
main ne har shakhs ke mathe pe pasina dekha

us ne sahmi hui aankhon pe hatheli rakh li
jab khas-e-jism se uthta hua shoala dekha

goshe goshe mein kisi khauf ki parchhain thi
ghar ki har chiz pe aaseb ka saya dekha

sab ki peshani pe haalat ki tariki thi
sab ke honton pe kade waqt ka nauha dekha

koi tahzib bhi saista-e-malbus nahin
jis ko bhi dekha sar-e-rah barahna dekha

hans ke milne se tasanno ki chamak chhup na saki
hae wo chehra jo main ne pas-e-chehra dekha