numud pate hain manzaron ki shikast se fath ke bahane
charagh zinda kiya hai mera gali mein dam todti hawa ne

ye jaante hain ki samne hai gurez karti hui mohabbat
magar mere sath chal rahe hain wahi mazahir wahi zamane

musafiron ke liye to yaksan hai dasht aur shahr se guzarna
ki sham hote hi tan lete hain log khwabon ke shamiyane

to kyun ye sahil ki dhup mere nidhaal qadmon se aa lagi hai
mujhe kinare laga diya hai agar kisi shakhs ki dua ne

kisi ko ek aatish-e-guman ne tamam-tar rakh kar diya hai
kisi ko kandan bana diya hai yaqin ki khak-e-kimiya ne

har aan mere wajud mein yun ana ki tamir ho rahi hai
ki jaise bheja gaya hun main bhi zamin par ek makan banane

mujhe yaqin hai ki mere bas mein hai manzil-e-shauq par utarna
mujhe bahut hausla diya hai meri mohabbat mere khuda ne