pahadon se abhi nikla nahin tha
main dariya tha magar gahra nahin tha

ayan hota kisi par raaz kyun-kar
abhi wo waqt hi aaya nahin tha

sar-e-maqtal mere hi tazkire the
magar main ghaar se lauta nahin tha

haram tha muntazir sadiyon se jis ka
wo koi but-shikan aaya nahin tha

ajab andaz ka tha ilm mera
kisi ke fahm mein aata nahin tha

main aise bhes mein basti se guzra
kisi ne mujh ko pahchana nahin tha

shab-e-hijrat bahut khadshe the lekin
zamana nind se jaga nahin tha

kuchh aisi raushni chhai hui thi
kisi ko kuchh nazar aata nahin tha

yahi pahchan thi 'asif' hamari
hamare pas aaina nahin tha