pahle bhi kaun sath tha
ab jo koi nahin raha

waqt sitam-zarif tha
waqt ka phir bhi kya gila

kaisi ajib sham thi
kaisa ajib waqia

kahne ko kah rahe hain log
main ne tujhe bhula diya

qissa ye hai ki main tujhe
dil se kahan bhula saka

tark-e-talluqat ka
baqi hai ek marhala

baqi hai ab bhi zehn mein
khwabon ka ek silsila

ishq se nisbaton mein hai
mere safar ka rasta

sham hui to chal pada
hijr-zadon ka qafila

koh-kani se rabt hai
nam-o-nasab ka zikr kya