pahle to un ko udne udane ki pad gai
phir aasman zamin pe lane ki pad gai

kya kya ganwa diya hai mohabbat mein aaj tak
ek din mujhe hisab lagane ki pad gai

ab tak qadim zakhm hararat mein the mere
zalim ko apna zulm badhane ki pad gai

jiddat gham-e-hayat ki dil mein liye hue
main ro raha tha us ko hansane ki pad gai

izhaar-e-ishq karne hi wala tha un se mein
wapas unhen to aate hi jaane pad gai

main bhi lahuluhan hun wo bhul hi gaya
us ko to apna zakhm dikhane ki pad gai

dam aakhiri hai lab pe mera us ko dosto
is haal mein bhi chhod ke jaane ki pad gai

kuchh nekiyan bhi tu ne kamai hain kya 'malik'
daulat to be-shumar kamane ki pad gai