ruthna tera sar-e-sham bura lagta hai
shab ko phir chand lab-e-baam bura lagta hai

nam le le ke main jita hun jahan mein jis ka
jaane kyon us ko mera nam bura lagta hai

gham bhi mil jae agar un ka to qismat ban jae
ishq mein kis ko ye inam bura lagta hai

aadmi auron ko badnam kare ji bhar ke
apna jab nam ho badnam bura lagta hai

ho safar aisa ki mahbub ho manzil jis ki
ishq walon ko tab aaram bura lagta hai

jab se dekhi hain teri mast sharabi aankhen
nashsha-e-baada-e-gulfam bura lagta hai

ho bure kaam se jo daulat-o-shohrat hasil
phir 'malik' kis ko bura kaam bura lagta hai