pahli si ab wo shokhi guftar bhi nahin
muddat se zauq-e-naghma-o-ashaar bhi nahin

suni padi hai manzil-e-diwangi-e-ishq
kya ho gaya ki koi sar-e-dar bhi nahin

waiz sharab-noshi ke behad khilaf hain
mil jae muft ki to kuchh inkar bhi nahin

wo samne jo aae to nazren na uth sakin
ab mujh mein jaise taqat-e-didar bhi nahin

kab hogi khatm 'tahira' sham-e-gham-e-hayat
ab tak numud-e-subh ke aasar bhi nahin