paiham mauj-e-imkani mein
agla panw nae pani mein

saf-e-shafaq se mere bistar tak
saton rang farawani mein

badan visal-ahang hawa sa
qaba ajib pareshani mein

kya salim pahchan hai us ki
wo ki nahin apne sani mein

tok ke jaane kya kahta wo
us ne suna sab be-dhyani mein

yaad teri jaise ki sar-e-sham
dhund utar jae pani mein

khud se kabhi mil leta hun main
sannate mein virani mein

aakhir socha dekh hi lije
kya karta hai wo man-mani mein

ek diya aakash mein 'bani'
ek charagh sa peshani mein