palkon ke dil-fareb ishaaro jawab do
ai be-qarar dil ke sahaaro jawab do

jhurmut mein kahkashan ke hain sar-basta kya rumuz
ai charkh-e-akhzari ke sitaro jawab do

taswir-e-kaenat mein ho kitni der se
dil khinchte hasin nazaro jawab do

gahraiyon ke bhed ki hai justuju bhi ki
ai qulzum-e-junun ke kinaro jawab do

hun main jo be-sabaat to kya zamzama karun
ho tum bhi be-sabaat bahaaro jawab do