panw ka dhyan to hai rah ka dar koi nahin
mujh ko lagta hai mera zad-e-safar koi nahin

baz auqat to main khud pe bahut chikhta hun
chikhta hun ki udhar jao jidhar koi nahin

sar pe diwar ka saya bhi udasi hai mujhe
zahiran aisi udasi ka asar koi nahin

aakhiri bar mujhe khinch ke sine se laga
aur phir dekh mujhe maut ka dar koi nahin

khud-kushi karte samay puchhta hun mera aziz
aur aawaz si aati hai to mera koi nahin

bhari duniya hai sisakne mein jhijak hogi tumhein
ye mera dil hai idhar ro lo idhar koi nahin

ek din log mujhe takht-nashin dekhenge
ya ye dekhenge mera jism hai sar koi nahin

us ki hijrat bada aasab-shikan saneha thi
shahr to shahar hai jangal mein shajar koi nahin

subh se raat ki mayusi bhagane ka sabab
koi to hota mere dost magar koi nahin

be-khayali si mujhe god mein bhar leti hai
dar pe dastak ho to kah deta hun ghar koi nahin