panw le aae mujhe wadi-e-pur-khar ke pas
sar mein sauda hai ki chaliye usi diwar ke pas

mohtasib zid se teri dil mein yahi aata hai
mai-kashi ja ke karen teri hi diwar ke pas

ye nai tarz-e-sitam tum ne nikali sahib
mera khat jate ho padhwane ko aghyar ke pas

fasl-e-gul aai hai phir dasht-nawardi ho nasib
panw ke aable pahunchaenge phir khar ke pas

na utha hum ko ki sae ki tarah se bekar
ek muddat se pade hain teri diwar ke pas

dur se dekhte hi mujh ko kaha dur us ne
ab na jaenge kabhi aise dil-azar ke pas