panw mein dur ka safar chamke
raat basti mein jab khandar chamke

gar dua hai to phir asar chamke
shakh par ek to samar chamke

ek aaseb hai har ek ghar mein
ek hi chehra dar-ba-dar chamke

zulmaton ki zamin par dekhen
kis tarah nur ka nagar chamke

in chamakte hue andheron mein
ek to harf-e-mo'tabar chamke

raushni ho to ruh tak larze
aur andhere mein ek dar chamke

sahilon ki shafiq aankhon mein
dhup kapde utar kar chamke