parae dasht mein ninden luta ke aai hun
par us ki aankh mein sapne saja ke aai hun

main kuza-gar to nahin thi magar haqiqat hai
main us ki marzi ka us ko bana ke aai hun

jise bhi jaana ho jae charagh jalta hua
bada kathin tha agarche bujha ke aai hun

palat to aai hun lekin khamosh dariya ko
sulagti pyas ka qissa suna ke aai hun

wo intizar karega mujhe yaqin hai magar
main ab kabhi na milungi bata ke aai hun

huzur-e-ishq batao mujhe kahan jaun
tumhein khabar hai main naw jala ke aai hun

wo tere wade wo baaten wafa khulus 'farah'
main khaare pani mein sab kuchh baha ke aai hun