pareshan kyon na ho jaun kisi pagal ki surat
nazar aati hai mujh ko aane wale kal ki surat

suna tha ishq ka rasta bada kanton bhara hai
main sach kahta hun mujh ko to laga makhmal ki surat

rag-o-pai mein na jaane kaun aa kar bas gaya hai
mahakti hain meri tanhaiyan sandal ki surat

mohabbat ka hukumat ka ki daulat ka nasha ho
bana deta hai ye insan ko pagal ki surat

taffun ka to sara shahr aadi ho chuka hai
mahak kar kya karenge hum bahut sandal ki surat

mere josh-e-numu se tum abhi waqif nahin ho
panap sakta hun diwaron se main pipal ki surat

main apne zauq ko bedar rakkhun kaise 'ambar'
bahut din ho gae dekhe bhari botal ki surat