parwaz mein jo sath na de aasman par
behtar hai khak daliye aisi udan par

ab qurb-o-baad mein na raha koi fasla
duniya simat ke aa gai mere makan par

mera harif darpai-e-azar hai mere
mujh ko hadaf banata hai wahm-o-guman par

shah-zor se kabhi nahin karta muqabla
chalta hai us ka zor faqat be-zaban par

mizan-e-adl ko nahin lata ba-ru-e-kar
karta hai inhisar wo farzi bayan par

ye khu-e-be-niyazi hai mujh ko bahut aziz
aae kabhi na harf meri aan-ban par

jis ki nahin hai aaj kahin koi yaadgar
karta hai fakhr wo mere nam-o-nishan par

dehli mein ek shaer-e-gumnam ka kalam
'barqi' hai ab muhit zaman-o-makan par