pata chala ki meri zindagi mein likkha tha
wo jis ka nam kabhi diary mein likkha tha

wo kis qabile se hai kaun se gharane se
sab us ke lahje ki shaistagi mein likkha tha

nazar mein aae bahut se saje bane chehre
magar jo husn teri sadgi mein likkha tha

wo mujh gharib ki haalat pe aur kya kahta
tamam zahr to us ki hansi mein likkha tha

gae dinon ki kahani hai jab raison ka
waqar chaal ki aahistagi mein likkha tha

'faraaz' dhund rahe ho wafaon ki khushbu
ye zaiqa kisi guzri sadi mein likkha tha