paya maza ye hum ne apni nigah ladi ka
jo dekhna pada hai ghussa ghadi ghadi ka

uqda to naznin ke abru ka hum ne khola
ab kholna hai us ki khatir ki gul-jhadi ka

is rashk-e-mah ke aage kya qadr hai pari ki
kab pahunche husn us ko aisi giri-padi ka

is gul-badan ne hans kar ek le ke shakh-e-nasrin
hum se kaha ki kije kuchh wasf is chhadi ka

jab hum 'nazir' bole ai jaan ye wo chhadi hai
dil tutta hai jis par jun phul pankhudi ka