phaila hua hai bagh mein har samt nur-e-subh
bulbul ke chahchahon se hai zahir surur-e-subh

baithe ho tum jo chehre se ulte naqab ko
phaila hua hai chaar taraf shab ko nur-e-subh

bad-qismaton ko gar ho mayassar shab-e-visal
suraj ghurub hote hi zahir ho nur-e-subh

pau phatte hi riyaz-e-jahan khuld ban gaya
ghilman-e-mahr sath liye aai hur-e-subh

murgh-e-sahar adu na moazzin ki kuchh khata
'parwin' shab-e-visal mein sab hai futur-e-subh