pher kar tegh-e-nazar tegh-e-jafa se pahle
mar dala mujhe zalim ne qaza se pahle

ab mera khun-e-jigar hathon mein malte hain wo
us se nafrat thi jinhen rang-e-hina se pahle

zulf mein chhune na paya ki bandhe mere hath
di sitamgar ne saza mujh ko khata se pahle

shauq-e-didar ki tezi se main aksar har subh
kucha-e-yar mein jata hun saba se pahle

aisi tasir pe sau jaan se sadme qurban
mere ghar aa gae wo meri dua se pahle

pas 'sabir' ka buto aaj na karna padta
dur rahte agar is mard-e-khuda se pahle