phir aaj dard se raushan hua hai sina-e-khwab
saja hua hai mere zakhm se madina-e-khwab

khizan ki fasl mein jo rizq-e-wahshat-e-shab tha
luta raha hun sar-e-shab wahi khazina-e-khwab

musafiran-e-shab-e-gham tumhaari khair to hai
tadakh ke tut gaya kyun mera nagina-e-khwab

haqiqaton ke bhanwar se koi nikale phir
rawan kare meri jaanib koi safina-e-khwab

bana diya teri sohbat ne be-adab in ko
koi sikhae in aankhon ko ab qarina-e-khwab

koi to ho ki jo mujh ko fareb-e-paiham de
wo koi husn-e-haqiqat ho ya hasina-e-khwab

ye aankh hai hama-dam gardish-e-tajassus mein
talash karti hai mujh mein koi dafina-e-khwab

fishaar-e-nim-shabi se ab in dinon 'shahid'
hai chaak chaak meri jaan qaba-e-sina-e-khwab