phir dhyan mein biti hui yaadon ka safar hai
phir kucha-e-jaanan ki taraf dil ka guzar hai

go qaht hai sayon ka yahan dhup ke ban mein
khwabon ki ghani chhanw bhi aankhon mein magar hai

rutha hua hai mausam-e-ikhlas jahan bhi
chahat ka wahin ped bhi be-barg-o-samar hai

har gam pe kyon khauf na ho tera safar mein
mahrum ujalon se dilon ka bhi nagar hai

kya hogi tar-o-taza koi shakh-e-tamanna
shadab abhi tak wahi ek gham ka shajar hai