phir mujhe har sitam gawara hai
aap kah den ki tu hamara hai

multafit aap bhi hue hain aaj
jab mujhe maut ne pukara hai

maut jab zindagi se behtar thi
hum ne wo waqt bhi guzara hai

tum mujhe ghair kyon samajhte ho
ab mera har-nafas tumhaara hai

muddaton gham ko raaz mein rakkha
ab to ye raaz aashkara hai

dub jaenge dubne wale
ek tinke ka kya sahaara hai

tum hi yaad aae ho musibat mein
jab pukara tumhein pukara hai

tum agar mai pilao aankhon se
talkhi-e-zist bhi gawara hai

ai 'shifa' dost se nahin shikwa
hum ko apni wafa ne mara hai