phir mulaqat mein hai ishq ke aaghaz ka rang
wahi aawaz ki nikhat wahi andaz ka rang

aam alfaz mein poshida maani ki tahen
har nigah-e-ghalat-andaz liye raaz ka rang

sar-nigun haibat-e-jallad-o-shikoh-e-sultan
didani dar pe tha ishq-e-sar-e-afraaz ka rang

aae mahfil mein to larzi hain charaghon ki lawen
un ke didar se hai shokh gul-e-naz ka rang

haal-e-dil chhup na saka parda-e-khamoshi mein
tarjuman dil ka bana aariz-e-ghammaz ka rang