phir nigahon ko wahi manzar purane de gaya
zindagi ke waste kaise bahane de gaya

mujh ko apni pusht par rakh kar hawaen le udin
aur mera shauq mujh ko taziyane de gaya

ye karam us ka jo mujh ko pattharon ke shahr mein
jitne bhi shishon ke the sab kar-khane de gaya

main ne us se kuchh nahin manga magar wo khud mujhe
jo bhi us ke pas the sare khazane de gaya

ek hi shab wo yahan thahra magar jate hue
kya chhupa kar le gaya aur kya na jaane de gaya

us parinde ne to ek muddat se khaya tha na kuchh
ek shikari aaj aa kar us ko dane de gaya