phir tere aastan pe le aai
khinch kar lazzat-e-jabin-sai

pesh-o-pas ko bahae jata hai
tera sailab-e-rang-o-ranai

koi bekas duaen deta hai
wo teri pursish-o-pazirai

phir se betab hai dil-e-shaida
kisi bhule hue ki yaad aai

ek parda hai khud-farebi ka
ye mera zauq-e-naghma-pairai

matla-e-subh-e-nau-bahaar bane
us mujassam haya ki paidai

nazar ehsas-e-husn se makhmur
lal-e-khush-ab mein masihai

didani hai ada-e-mahbubi
sare andaz hain zulekhai

aafat-e-aql-o-hosh hai 'khalid'
us pari-ru ka husn-e-sahrai