phul sahra mein khila de koi
main akela hun sada de koi

koi sannata sa sannata hai
kash tufan utha de koi

jis ne chaha tha mujhe pahle-pahal
us sitamgar ka pata de koi

jis se tute mera pindar-e-wafa
mujh ko aisi bhi saza de koi

raat soti hai to main jagta hun
us ko ja kar ye bata de koi

jo mere pas bhi hai dur bhi hai
kis tarah us ko bhula de koi

ishq ke rang liye phirta hun
us ki taswir bana de koi

dil ke khirman mein nihan hain shoale
apne daman ki hawa de koi

phul phir zakhm bane hain 'nasir'
phir khizaon ko dua de koi