phulon ka khayal aae to lagta hai ki tum ho
taron pe nazar jae to lagta hai ki tum ho

ghanghor ghataon ke jhamelon mein achanak
bijli koi lahrae to lagta hai ki tum ho

mamta ki hasin banh mein soya hua masum
khwabon mein jo muskae to lagta hai ki tum ho

chalte hue sunsan si rahon mein akele
patta bhi khadak jae to lagta hai ki tum ho

wo dhun hai tumhaari ki zamane mein kahin bhi
pael koi chhankae to lagta hai ki tum ho