phulon ki hai takhliq ki shoalon se bana hai
kandan sa tera jism jo khushbu mein basa hai

jangal ke ghazalon pe ajab khauf hai tari
tufan koi shahr ki jaanib se utha hai

ye husn-e-chaman hai mere ehsas ki takhliq
warna kahin gul hai na kahin mauj-e-saba hai

har lafz tere chehre ki taswir bana tha
kis karb se sau bar tere khat ko padha hai

dalo mere kanon mein bhi pighla hua sisa
ai barhamno main ne bhi to wed suna hai

tum dhundte phirte ho jise sehn-e-chaman mein
wo shakhs abhi kucha-e-qatil ko gaya hai